سما والحب

 

ياووو عريس تانى انا زهقت 

انا قولت ليكم مليون مره انا  مش عاوزه اتجوز 

ياماما ارحمونى بقى مش كل يوم والتانى  يااخويا يابابا يجبوا لى عريس ايه اموت ليكم نفسي عشان ترتاحوا

صحبتي ريم قاعده معايا فى غرفتى بصت لي وقالت 

 ايه ياسما هو حد لاقى ياريت انا يجيلى عرسان زيك كده وانا كان زمانى فى بيت العدل من زمان

والدتى:قولى ليها  والنبى ياريم وعقليها انا غلبت معاها انا حايشه عنها اخوها ووالدها بالعافيه وهما لو نفذ صبرهم مش عارفه ممكن يعملوا معاها ايه 

انا مش فاهمه هى مالها معقده من الجواز كده ليه

ريم لسه هتتكلم 

-بقوليك ايه ياريم ممكن تسكتي انتى هتستعبطى ولا ايه  وهتزيطى فيها قولت مش عاوزه اتجوز 

هو انتوا اللى هتتجوزوا ولا انا

والدتى :بقولك ايه انا زهقت اعملى حسابك واجهزى عشان العريس 

اخوكى بيقولى هيجى الساعه ٧يعنى أمامه ٣ساعات ابقى اقعدى وشوفيه وانتى حره تقبلى او ترفضى بس ما ينفعش ترفضي كده من غير ماتشوفيه 

ريم:والدتك عندها حق شوفيه مش هتخسرى حاجه 

-قولت مش هشوف حد ومش هحضر حاجه 

والدتى خرجت وهى بتقول انتى حره بقى بس انا خلاص مش هقف فى صفك تانى منك لابوكى واخوكى 

واول ما خرجت والدتى 

-ايه ياريم هو انتى مش عارفه اللى فيها ايه كلامك اللى قولتيه ده

ريم:ايه يا سما كلام ايه بس اللى قولته ومزعلك

 - مره والدتك عندها حق ومره دا انا لو مكانك كان زمانى فى بيت العدل ايه انتى بتقوميهم عليا زياده هو انا ناقصه

ريم:امال كنتى عاوزانى اقول ايه

-تسكتى وماتقوليش حاجه هو انا ناقصه 

ريم:لا وعلى ايه مادام كلامى  بيضيقك يبقى اقوم امشي افضل 

-لا تقومى تروحى فين استنى اقعدى فكرى معايا نشوف هنطفش العريس اللى جى ده ازاى 

ريم:والله ما انا عارفه واخرت ده كله ايه 

-انا عارفه فكرى بس معايا 

ريم:بصى انا هعملك ميكب يغمق وجهك ويضيق عينك ويكبر فمك وتسريحة تبين ان شعرك خشن اهو عشان حتى ما يتمسكش بيكى لما ترفضيه بأى سبب مش مرتاحه ليه مش عاجبنى اى حاجه 

-خلاص ماشي ويعنى انا هغلب كان غيره اشطر

وفعلا قعدت ريم تنفذ اللى قالت عليه وعملت ليها ميكب غير ملامحها كتير للاوحش طبعا

ولسه هتقول ليها انا همشي بقى لحسن دا خلاص العريس قصدى الضحيه الجديده زمانها على وصول 

يالا سلام بقى ولسه هتفتح باب الغرفه رن جرس الباب وراحت والدتى وفتحت الباب وكان واخويا والعريس اللى جايبه داخل 

وريم صحبتي فتحت الباب وخارجه ويدوب خرجت ولقتها رجعا تانى وهى ملهوفه وكل اللى على لسانه سما سما مش هتصدقى اللى هقوله ليكى 

-فى ايه ياريم انتى مش كنتى ماشيه يابنتى ايه اللى رجعك

ريم:اللى شوفته هو اللى رجعني 

-ايه شوفتى ايه 

ريم:تعالى معايا وبصي كده على عريسك 

-ماله يعنى هيكون شكله ايه 

ريم شدتني من ايدى تعالى بس بصي عليه 

مشيت معاها ورحت عشان ابص

عشان اتفاجىء بسيف هو اللى جى يطلب ايدى 

وانا وقفت اتسمرت فى مكانى مش مصدقه اللى عينى شيفاه 

ازاى وهو اخر مره شوفته فيها اتخلى عنى وقال لى انا مش هقدر 

اتجوز دلوقتى انا هسافر لى كام سنه اجهز نفسي واحوش قرشين وهرجع وقتها ابقى اتجوز إنما دلوقتى ادخل بيوت الناس اطلب ايد بنتهم بأيه وازاى ورغم بكائى ليه وتوسلي ليه انه يستر عليا 

اصل سيف ده اللى كنت بحبه وضحك عليا باسم الحب وفضل يوعدنى بحياتنا مع بعض وحبنا اللى هيعيش العمر كله لما صدقته وفى لحظة ضعف سلب منى اعز ما املك وسافر وسابنى وخلانى مش قادره أوافق على اى عريس أتقدم لي لما جننت أهلى وكنت كل مره بحجه وانا كنت خايفه من موضوع عملية الترقيع دى

  ازاى رجع كده ومن نفسه  

وهنا دلوقتى وجى عشان يطلب ايدى انا مش مصدقه نفسي 

وعشان كده ريم اول ما شفته اتفاجئت ليها حق دا احنا عملنا مغ سيف كل اللى ممكن نقدر نعمله عشان يتجوزنى ويصلح غلطته وكان بيتهرب بكل الوسائل لحد ما سافر وسابنى 

مسكت ايد ريم وقولت اللى انا شيفاه ده حقيقي مش حلم 

ريم:ايوه حقيقه وفعلا سيف بره وجى عشان يطلب ايدك 

-طب اتفضلى هدى كل الميكب اللى هببتيه فى وشي ده واعملى لي ميكب جديد عاوزه اكون قمر ليلة البدر عوزاه يتهوس بيا وما يندمج انه رجع عشان يطلب ايدى يالا ياريم بسرعه عشان ما اتأخرش عليه بصي اعملى عينى بده واعملى حجبى بده والشفايف ده كويس ليها يالا ياريم 

ريم:طيب طيب 

وبعدها بشويه دخل علينا اخويا يالا ياسما العريس قاعد بره والدتك بتجهز حاجات تقدمها ليه فى المطبخ اخلصي عشان تقدميها ليه 

-حاضر يا حسام يا اخويا يا حبيبي 

اخويا:غريبه ياعنى المره دى لا سمعت مش عاوزه اتجوز ولا سيبونى فى حالى 

-ما تكسفنيش بقى يا حسام الرأى رأيك يا اخويا 

اخويا:والله انا مش مصدق اللى سمعه 

دخلت علينا والدتى 

والدتى:ايه ياحسام انت سايب العريس ووالدته وصاحبكم لوحدهم وواقف هنا اتفضل ما ينفعش كده 

احنا خلاص جيين وراك 

حسام:اصل مستغرب بصراحه موقف سما المره دى تصدقى بتقول لى اللى تشوفه يا اخويا ياحبيبي 

والدتى:ايه بتقول ايه لا كده ليك حق تستغرب فعلا بس يالا 

حسام:حاضر 

وكل ده وريم شغاله تظبط الميكب اللى كانت عملاه 

والدتى:يالا ياسما قدامى على المطبخ ودخلت كعادت كل عروسه وقت خطوبتها وانا شايله المشروبات والجاتوا لاقدمها لوالدة العريس وللعريس والجالسين 

ويدوب قدمت ليهم الحاجه وجلست 

ووالدت العريس قالت بسم الله ماشاء الله ايه القمر ده تعالى جنبي هنا ياعروسه 

وراحت قالت لسيف ايه رايك ياعريس فى عروستك 

سيف قمر ياماما

وانتى ياعروسه ايه رايك فى عريسك 

انا مردتش وماكنتش مركزه معاها بعد رد سيف وكأنه اول مره يشوفني وطريقة كلامه كده مش زى عادته معقوله يكون بيمثل انه اول مره يشوفني وسرحت وقولت يمكن 

اعادت والدت سيف كلامها مره اخرى ولكن صدمتنى اكتر عندما قالت ايه رايك ياعروسه فى احمد عريسك انتى مكسوفه ولا ايه 

قومت وقفت من المفاجئه وانا بقول ايه احمد 

الكل نظر لى باستغراب وهما بيسألوا مالك ياسما فى ايه 

وريم واقفه وراء ستاره مراقبه الموقف واول ماسمعت انه اسمه احمد لطمت خدها 

وانا اغمى عليا مره واحده وسقطت على الأرض 

الكل قام وقف وريم دخلت عليهم وراحت عليا وبتقومنى هى واخويا 

ريم؛مافيش حاجه ماتقلقوش هى بس ما كلتش حاجه من الصبح وكانت واخده علاج مضاد حيوي اكيد جالها هبوض بس وهتبقى كويسه دلوقتى واخدتنى ودخلتنى غرفتى واخويا رجع يقعد مع العريس ووالدته وفضلت ريم تفوق فيا وانا اول ما فتحت عينى والدتى رجعت قعدت مع الناس بعد ما اتطمنت انى فوقت 

بصيت لريم 

وقولت انتى فاهمه حاجه هو مش اللى قاعد بره ده سيف ولا دى تهيأت ولا ايه بظبط 

ريم :والله ما اعرف انا كمان مش فاهمه حاجه الصوره هى إنما طريقة الكلام وانه اسمه احمد وانه مش عرفك كل ده يقول انه مش سيف 

طب انتى فاكره سيف اسمه سيف ايه بالكامل 

-سيف اسمه بالكامل سيف حازم على 

ريم :احنا كده لازم نعرف اسم اللى قاعد بره ده بالكامل 

يمكن يكون حد قريبه او من عائلته وتكون العائله دى فيها بيطلعوا شبه بعض ولا حاجه ولا استنى يمكن تؤم ليه 

-بس مش فاكره ان سيف قال لى حاجه زى كده بس استنى هو كان قايل لى انه مسافر لاخوه اللى شغال بره من زمان بس انا كنت فكره ان اخوه الكبير اكمنه مسافر من وقت طويل 

ريم:يبقى زى ما قولت ليكى دا اخوه تؤم اسمعى منى ما حدش يكون شبه حد كده الا لو كان تؤم 

انا من رأى تصبري وما تخديش قرار ولا تبوحى بأي حاجه الا لما تفهمي ايه الحكايه 

اصل حتى لو اخوه جه من السفر ازاى جى يطلب ايدك وياترى هو عارف حاجه عنك من اخوه ولا مجرد صدفه وجى يطلب ايد واحده قاعدة صالونات وميعرفش عنها حاجه وجى من طرف حد رشحك ليه بصراحه مش عارفه 

بس امشي فى الخطوبه فتره لحد ما كل حاجه تبان ليكى وبعد كده قرري هتعملى ايه 

شويه والدتى دخلت ايه يابنتى الناس هيمشوا بيقولوا نيجى واقت تانى بس عاوزين نتطمن على العروسه 

قومت وقفت وقولت لوالدتى حاضر هظبط نفسي وهطلع 

وفعلا خرجت ليهم وقعدت معاهم 

وانا قاعده اتأمل فى العريس ومش مصدقه انه مش سيف الشبه غريب فعلا بس الطبع مش هو 

ومابقتش قادره اقعد ساكته فقولت فجأه هو انت اسمك أحمد ايه 

بصو لى بأستغراب 

وهو قال أسمى احمد حازم على 

وانا اتجننت وقومت وقفت تانى 

ريم كانت قاعده بصت لى وبرقت بعينها 

رحت قعدت تانى 

والدت العريس:اشمعنا هو هيفرق الاسم معاكى اوى كده 

وايه الحكايه كل شويه تقومى تقفى فجأه كده مالك يا بنتى انتى أعصابك تعبانه ولا ايه 

والدتى هى بس تلاقيها عاوزه تتكلم ومش عارفه تقول ايه 

وده الكلام اللى جه على بالها عادى يعنى

والدت العريس :يبقى الغلط علينا احنا المفروض نسبهم يقعدوا مع بعض شويه يتعرفوا على بعض 

ايه رايكم نسبهم قاعدين مع بعض شويه واحنا نروح نقعد فى الغرفه المقابله ليها دى 

والدتى :مافيش مشكله حقهم طبعا وقاموا وسابونا لوحدنا 

وانا اول سؤال سألته ليه لما بقينا لوحدنا انت ليك اخوات 

احمد :ايوه ليا اخت واخ تؤم 

-واخوك ما جاش معاك ليه 

احمد:لا اصل اخويا سيف مسافر وانا يدوب مسكته مكانى وقولت ارجع اشوف حياتى واكمل نص دينى 

اصل انا بدأت رحلة الكفاح بدرى شويه عن اخويا صحيح انا وهو تؤم وسن واحد بس هو ما كنش حابب السفر وسافرت انا وكونت نفسي والحمدلله ربنا كرمني اخر كرم ولما سيف عرف انى ناوى ارجع معرفش ايه خلاه غير رأيه فى السفر وقال لى انى ما ارجعش الا لما يجى لي وامسكه مكانى وده اللى حصل وادينى نزلت وقاعد معاكى اهو 

- وانت جيت تتقدم لي كده من غير ماتعرفنى مش شايف ان الموضوع ده قدم شويه 

احمد:انا كنت مسافر ومعرفش حد هنا ومعظم بنات قريبى اللى كان ممكن يكونوا مناسبين لى اتجوزوا وارتبطوا

 فبصراحه كده سبت الموضوع لوالدتى تشوف لى عروسه ولما سألت ودورت فى ناس رشحوكى ليها بس سألت عنك وعن اهلك وعرفت عنكم كل خير وناس دلونى على اخوكى رحت وكلمته وادينا قاعدين مع بعض وبصراحه كده انا بحمد ربنا انه وصلنى ليكى ياترى دا احساسك اتجاهى بردو ولا ايه

-ما قدرش اقول ليك رأي من اول مره نشوف بعض فيها ربنا يعمل الخير 

وفضل هو يتكلم وانا ما بقتش معاه خالص وحاسه انى تايه ومش مستوعبه معقوله يكون فى صدفه للدرجه دى 

لازم اخلينى معاهم للآخر لازم افهم انا مش مستريحه للصدفه دى 

شويه ورجعوا دخلوا علينا 

والدت احمد :احنا هنمشي بقى ومنتظرين ردكم فكروا واسألوا عنا براحتكم دا حقكم بردو يالا يا احمد 

احمد قام وسلم ومشيوا

لسه احمد بيقول لى ها ايه راي عروستنا انا شايفهم ناس محترمين ومناسبين ولا ايه ياماما انا ما انتظرتش لما ماما ترد 

-انا دخله عرفتى وادونى وقتى افكر 

وسبتهم ودخلت وريم دخلت ورايا وقفلت الباب 

ريم:ايه ناويه تعملى ايه اكيد هترفضى طبعا بعد ما اتأكدتى انه اخوه 

-بس انتى طلعتى عفريته ياريم طلع زى ما توقعتى 

ريم:المهم ناويه على ايه انا قولت انك هترفضي اول ما يسألوكى هتفكرى فى ايه

-الا هفكر فى ايه انا مش مقتنعه ان الموضوع صدفه خالص انا بيتهيألي لى ان .تابع

تابع القرأه الجزء الثانى